Ynghylch

Mae’r rhan fwyaf o bobl wedi gweld yr anifeiliaid hoffus yma’n pori mewn glaswellt tal ac yn chwilio am eu hoff fwyd. Cawsant eu cyflwyno i ddechrau i’r DU gan y Normaniaid fel bwyd ac am eu ffwr ond nawr maen nhw’n olygfa gyffredin. Maen nhw’n byw mewn grwpiau mawr mewn system o dyllau o dan y ddaear sy’n cael ei galw’n ‘cwninger’. Mae’r benywod yn geni rhwng tri a saith o gwningod bach bob mis yn ystod y tymor magu – mae hynny’n llawer o gwningod bach! Mae cwningod yn fyrbryd blasus iawn i garlymod, bwncathod, ffwlbartiaid a llwynogod coch, a dyma pam mae cael cwninger i guddio ynddi mor bwysig.